اساتذہ کی اہلیتی جانچ: مسائل و مصائب کا انبار

گزشتہ ۲۶جون ۲۰۱۱ اُن آٹھ لاکھ لوگوں کے لیے یوم الحشر تھا، جو مستقبل میں استاذ بن کر قوم کی خدمت کرنے کی امید و آرزوکے چراغ اپنے دلوں میں ہمہ وقت روشن رکھتے ہیں۔ یو م الحشر اس معنی میں تھا کہ اس دن سرکار کی جانب سے اساتذہ کی مستقل تقرری کے واسطے ان کی قابلیت اور صلاحیت کو پرکھنے کے لیے ایک ٹیسٹ رکھا گیا تھا اور ملک بھر میں مختلف مراکز پر امیدواروں کا ہجوم نفسی نفسی کے عالم میں تھا۔ بات در اصل یہ ہے کہ جس طرح کالجوں اور یونیورسٹیوں میں تقرری کے لیے نیٹ کا معیار رکھا گیا ہے ، اسی طرح اسکول کی سطح پر اساتذہ کی تقرری کے لیے مرکزی سطح پر یا ریاستی سطح پر اساتذہ کی اہلیت کی جانچ کا معیار اس سال سے طے کیا گیاہے، اور اسی معیار پر کھرا اترنے کے لیے آٹھ لاکھ طلبا و طالبات اور عارضی طور پر بر سر روزگار اساتذہ پورے ملک میں مختلف مراکز پر جمع ہوئے۔
گزشتہ ۲۶ جون کو سی بی ایس ای کی جانب سے پورے ملک میں ۸۶ شہروں؍قصبوں کے ۱۱۷۸ مراکزپر سی ٹی ای ٹی کا انعقادکیا گیا تھا۔ ان ۱۱۷۸ مراکز پر طلبا کا ہجوم اور ان کو لاحق پریشانیاں قابل افسوس تھیں۔ اس کی ایک جھلک قومی راجدھانی دہلی میں بھی دیکھنے کو ملی۔ چونکہ اس ہجوم میں ، میں بھی شامل تھا، لہٰذا اس ہجوم کو لاحق پریشانیوں اور تجربوں سے میں بھی پریشان اور مستفید ہوا۔اس دن کے امتحان میں شرکت کرنے والوں کو کئی قسم کی پریشانیوں کا سامنا کرنا پڑا۔ سب سے پہلی مشکل جس کی شکایت سبھی نے کی وہ وقت کی قلت تھی۔ یعنی امتحان کا مقررہ وقت دیڑھ گھنٹہ تھا اور سوالات ایک سو پچاس۔ گو یا کہ ۹۰ منٹ میں ۱۵۰ سوال حل کرنے تھے، جو کسی بھی صورت میں ممکن نہیں تھا۔ چونکہ سوالات معروضی تھے ، لہٰذا آخری ۵منٹ میں تمام امید وار تقریبا ۳۰ سے ۵۰ سوالات بغیر پڑھے اور سجھے جوابی کاپی میں دیے گئے گولے کو قسمت کے سہارے پُر کرنے پر مجبور تھے۔ دل چسپ بات یہ ہے کہ امتحان گاہ سے نکلنے کے بعد امیدواروں نے تقریباً ایک زبان ہو کر کہا کہ اگلے سال گولہ بھرنے کی مشق کرکے آئیں گے۔ ان کے اس جملے سے اندازہ لگایا جا سکتا ہے کہ انھیں پوری امید ہے کہ اس سال وہ کامیاب نہیں ہو سکتے اور اگلے سال بھی وقت کی کمی کے باعث اسی طرح کی پریشانیاں سامنے آ سکتی ہیں لہٰذا کم وقت میں زیادہ گولہ بھرنے کی مشق کی جائے تاکہ کوئی جواب چھوٹنے نہ پائے چہ جائے کہ وہ سوالات کو سمجھیں یا نہ سمجھیں۔
اس دن کی ایک بڑی پریشانی یہ بھی تھی کہ امتحان کے مراکز پر تعنیات نگراں کو بھی اس امتحان کے قواعد و ضوابط سے متعلق پوری جانکاری نہیں تھی۔ایسا لگتا ہے کہ انھیں کسی بھی قسم کی ہدایات نہیں دی گئیں اور اگر انھیں ہدایات سے نوازا بھی گیا توانھوں نا اہلوں نے سنی ان سنی کردی، جس کی وجہ سے ان کے ساتھ ساتھ امیدواروں کو بھی کافی دقتوں کا سامنا کرنا پڑا۔ اس امتحان میں امیدواروں کو دو زبانوں کا بھی ٹیسٹ دینا تھا، اور ان زبانوں کا انتخاب آئین کے آٹھویں شیڈول میں موجود زبانوں میں سے کرنا تھا۔ انگریزی اور ہندی کے سوالنامے تو دیگر مضامین کے ساتھ یکجا تھے، مگر ان دونوں کے علاوہ جو زبانیں تھیں ان کے سوال نامے الگ الگ بنائے گئے تھے۔ اور یہ سوالنامے ان امیدواروں کو مہیا کرایا جانا تھا جنھوں نے انگریزی یا ہندی کے علاوہ دیگر زبانوں کا انتخاب کیا تھا۔ لیکن یہ سوالنامے ان طلبا کو تاخیر سے دئے گئے اور بعض مراکز پر ان امیدواروں کو انگریزی اور ہندی کے علاوہ دیگر زبانوں کے سوالنامے تو دئے ہی نہیں گئے۔ان بے چاروں نے بغیر سوالناموں کے اپنے جوابات قسمت کے سہارے اپنی جوابی کاپی میں بھردئے۔ اس سلسلے میں کئی مراکز پر ایک اور گڑبڑی ہوئی جو امتحان منعقد کرانے والے مراکز کی نا اہلی کو ثابت کرتی ہے ۔ ہوا یوں کہ بیشتر مراکز پر انگریزی اور ہندی کے علاوہ دیگر زبانوں کے سوالناموں کی کاپیاں ان کے اصل سوالناموں کی کاپی کے نمبر سیریز کے مطابق نہیں دی گئیں۔ مثلا اگر اصل سوالنامے کی کاپی کا سیریز نمبر اے ہے تو ان کو ضمیمہ سوالنامے کی کاپی بی؍سی؍ڈی سیریز کی دی گئی۔ اور چونکہ وقت کی کمی کے باعث امیدواروں نے اس بات کو نوٹس نہیں کیا اور وہ اپنے سوالات حل کرنے میں مصروف رہے۔لہٰذا امتحان گاہ سے نکلنے کے بعد انھیں معلوم ہوا کہ ایسی بھی گڑبڑ ہوئی۔ اب ایسی صورت میں تو امیدواروں کے صحیح جواب بھی غلط ہو جائیں گے، اور امتحانی مراکز کے نا اہل لوگوں کی غلطیوں کا خمیازہ امیدواروں کو بھگتنا پڑے گا۔
قابل غور بات یہ بھی ہے یہ امتحان صرف ان اسکولوں میں تقرری کے لیے منعقد کرایا گیا تھا جو مرکزی سطح پر پورے ملک میں ایک ادارے کی جانب سے چلائے جاتے ہیں مثلا کیندریہ ودیالیہ وغیرہ۔ ریاستی سطح پر چل رہے اسکولوں میں تقرری کے لیے اگرریاستی انتظامیہ سی ٹی ای ٹی کے معیار کو مان لیتی ہے تو ٹھیک ورنہ ان کو اختیار ہے کہ وہ ریاستی سطح کے اہلیتی امتحانات منقعد کرائے۔ اب ایسی صورت میں سی ٹی ای ٹی میں کامیاب امیدوار ایسی امید نہیں لگا سکتے کہ وہ ریاستی سطح کے سرکاری اسکولوں میں تقرری کے اہل ہیں بلکہ ان کو یاستی سطح کے اہلیتی امتحانات کے معیار پر بھی کھرا اترنا پڑ سکتا ہے۔ دوسری بات یہ کہ اکثر و بیشتر امیدواروں کا کہنا ہے کہ ایسے امتحان کیوں منعقد کرائے جار ہے ہیں جبکہ اساتذہ کی تقرری کے لیے امیدوار پہلے سے ہی ٹیچر ٹریننگ کورس کرکے اس کے اہل ثابت ہو چکے ہیں تو دوبارہ ان کے معیار کو کیوں پرکھا جارہا ہے۔ ان کا کہنا ہے کہ اس سے تو ان کی ٹیچر ٹریننگ کورسز کی ڈگریاں بے معنی سی ہو کر رہ جائیں گی۔ یہ بھی خیال رہے کہ اس امتحان میں کامیاب ہونے والا امیدوار اس بات کا مجاز نہیں ہوگا کہ اس کو سرکاری سطح پر اسکول کا استاذ مقرر کیا جائے بلکہ اس کو اسکول کی جانب سے تقرری کے لیے منعقد امتحان سے بھی گزرنا ہوگا۔ گو یا کہ اب ایک استاذ بن کر قوم کی خدمت کرنے کے لیے سب سے پہلے اسے ٹیچر ٹریننگ کی ڈگری حاصل کرنی ہوگی، اس کے بعدبھی اس طرح کے امتحان میں کامیاب ہونا پڑے گا۔ اور ا سکے بعد پھر ایک مرتبہ اساتذہ کی آسامی کو پُر کرنے کے لیے منعقد امتحان میں پاس ہوکر میرٹ میں سب سے اوپر اپنی جگہ بنانی ہوگی۔
میں اپنی اس تحری کے ذریعہ ان آٹھ لاکھ لوگوں اور مستقبل میں مزید پیدا ہوانے والے امیدواروں کی ترجمانی کرتے ہوئے حکومت وقت سے ، مرکزی اور ریاستی سطح کے وزرائے تعلیمات سے، تعلیمی محکموں میں اعلی عہدوں پر فائز سربراہان سے، اکیڈمیوں کے ذمہ داران، غیر سرکاری تنظیموں اور انجمنوں کے عہدے داروں سے دردمندانہ اپیل کرتا ہوں کہ ایسے امتحانات منعقد کرانے کی چنداں ضرورت نہیں ہے اور اگر ماہر تعلیمات اور ماہر نظم ونسق ایسا سمجھتے ہیں کہ اس کی ضرورت ہے تو مذکورہ بالا پریشانیاں دور کی جائیں۔ اگر ایسا ہی رویہ رہا تو ممکن ہے کہ کسی دن یہ بڑی تعداد میں حکومت وقت کے خلاف سڑکوں پر اتر سکتی ہے۔